Fyrsta mót Unglingamótaraðarinnar hófst í Þorlákshöfn í dag. Leikinn er 54 holu höggleikur án forgjafar í flokki 15-18 ára pilta og stúlkna. Að 36 holum liðnum er niðurskurður, þar sem efstu 70% kylfinga halda áfram og leika lokahringinn. Fullt er í mótið, en alls tekur 81 keppandi þátt, 25 í stúlknaflokki og 56 í piltaflokki.
Frábær skor sáust á fyrsta keppnisdegi, en sjö kylfingar léku Þorláksvöll undir pari.
Piltaflokkinn leiðir Kristján Karl Guðjónsson, GM, en hann lék á 65 höggum, sjö undir pari vallarins. Frábær hringur hjá Kristjáni, sem fékk einn örn, sex fugla og einn skolla í dag.
Höggi á eftir Kristjáni er Máni Freyr Vigfússon, GK, á sex höggum undir pari. Máni fékk einn örn, sjö fugla, einn skolla og einn tvöfaldan skolla á hring dagsins.
Pamela Ósk Hjaltadóttir, GKG, leiðir stúlknaflokkinn, en hún lék á 69 höggum í dag. Pamela fékk fimm fugla og tvo skolla á hringnum og leiðir mótið með tveimur höggum. Pamela er forgjafarlægsti kylfingur stúlknaflokksins, en hún var í verðlaunasæti í öllum sex mótunum sem hún lék í síðasta sumar.
Á eftir Pamelu er Tinna Alexía Harðardóttir, GK. Hún lék fyrsta hringinn á einu höggi undir pari, fékk fjóra fugla og þrjá skolla. Frábær hringur hjá Tinnu, sem fær 40 punkta fyrir vikið.
Golfklúbburinn Keilir á flesta keppendur í mótinu eða 20 talsins. Golfklúbbur Kópavogs og Garðabæjar kemur þar á eftir með 18 keppendur og Golfklúbbur Reykjavíkur með 13.
Hér má sjá rástíma og stöðu mótsins
| Golfklúbbur | Fjöldi keppenda |
|---|---|
| Golfklúbburinn Keilir | 20 |
| Golfklúbbur Kópavogs og Garðabæjar | 18 |
| Golfklúbbur Reykjavíkur | 13 |
| Golfklúbbur Akureyrar | 9 |
| Nesklúbburinn | 5 |
| Golfklúbburinn Leynir | 4 |
| Golfklúbbur Mosfellsbæjar | 4 |
| Golfklúbburinn Setberg | 2 |
| Golfklúbbur Hveragerðis | 2 |
| Golfklúbburinn Hamar Dalvík | 2 |
| Golfklúbbur Skagafjarðar | 1 |
| Golfklúbbur Suðurnesja | 1 |
| Samtals | 81 |
