Fyrsta mót Unglingamótaraðarinnar fer fram í Þorlákshöfn dagana 23.-25. maí. Leikinn er 54 holu höggleikur án forgjafar í flokki 15-18 ára pilta og stúlkna. Að 36 holum liðnum er niðurskurður, þar sem efstu 70% kylfinga halda áfram og leika lokahringinn. Fullt er í mótið, en alls tekur 81 keppandi þátt, 25 í stúlknaflokki og 56 í piltaflokki.
Kristján Karl Guðjónsson, GM, leiðir piltaflokkinn með sjö höggum fyrir lokahringinn, en hann er fimmtán undir pari eftir fyrstu tvo keppnisdagana. Kristján lék fyrsta hringinn á 65 höggum, sjö undir pari vallarins. Hann bætti sig um eitt högg á milli hringja og kom í hús á 64 höggum í dag, átta undir pari. Kristján getur með góðum lokahring bætt lægsta skor mótaraðarinnar, sem Gunnar Þór Heimisson sló í fyrra þegar hann lék á sautján undir pari í Sandgerði.
Hjalti Kristján Hjaltason er annar á átta undir pari, en hann hefur leikið báða hringina á 68 höggum.
Óliver Elí Björnsson átti stærsta stökkið á milli hringja, en hann fór upp um 20 sæti og bætti sig um 14 högg. Hann lék á 79 höggum í gær og 65 höggum í dag, þegar landsliðskylfingurinn sótti þrjá erni á par 5 holum Þorláksvallar.
Golfklúbbur Akureyrar á tvo efstu kylfinga stúlknaflokksins.
Bryndís Eva Ágústsdóttir leiðir mótið á einu höggi undir pari. Hún hefur leikið hringi sína á 73 og 70 höggum og heldur áfram góðu gengi sínu á mótaröðinni. Bryndís lék í sjö mótum síðasta sumar, vann fimm og varð tvívegis í öðru sæti.
Höggi á eftir Bryndísi er klúbbfélagi hennar, Lilja Maren Jónsdóttir. Hún lék frábært golf í dag og kom í hús á 67 höggum, fimm undir pari vallarins. Lilja fékk sjö fugla á hringnum í dag og hefur fengið þremur fleiri fugla en næsti kylfingur í stúlknaflokki mótsins.
Golfklúbburinn Keilir á flesta keppendur í mótinu eða 20 talsins. Golfklúbbur Kópavogs og Garðabæjar kemur þar á eftir með 18 keppendur og Golfklúbbur Reykjavíkur með 13.
Hér má sjá rástíma og stöðu mótsins
| Golfklúbbur | Fjöldi keppenda |
|---|---|
| Golfklúbburinn Keilir | 20 |
| Golfklúbbur Kópavogs og Garðabæjar | 18 |
| Golfklúbbur Reykjavíkur | 13 |
| Golfklúbbur Akureyrar | 9 |
| Nesklúbburinn | 5 |
| Golfklúbburinn Leynir | 4 |
| Golfklúbbur Mosfellsbæjar | 4 |
| Golfklúbburinn Setberg | 2 |
| Golfklúbbur Hveragerðis | 2 |
| Golfklúbburinn Hamar Dalvík | 2 |
| Golfklúbbur Skagafjarðar | 1 |
| Golfklúbbur Suðurnesja | 1 |
| Samtals | 81 |
