Tímabil íslenskra atvinnu- og afrekskylfinga er í fullum gangi og í vikunni eru Íslendingar á meðal keppenda á Nordic Golf League, LET Access mótaröðinni og HotelPlanner Tour.
Nordic Golf League
Á Nordic Golf League mótaröðinni fer MoreGolf Mastercard Stockholm mótið fram dagana 1. til 3. júlí á Haninge Golfklubb í Svíþjóð. Þar eru þeir Dagbjartur Sigurbrandsson og Hlynur Bergsson á meðal keppenda.
Báðir hófu leik í gær og eru í góðum málum eftir fyrsta hring. Hlynur lék hringinn á 72 höggum, eða pari vallar, á meðan Dagbjartur kom inn á 73 höggum, einu höggi yfir pari.
Hér má fylgjast með stöðu mótsins.
LET Access
Á LET Access mótaröðinni fer Swedish Strokeplay mótið fram dagana 1. til 3. júlí á Golf Uppsala Söderby í Svíþjóð. Þar eru þær Hulda Clara Gestsdóttir, Ragnhildur Kristinsdóttir og Andrea Bergsdóttir allar á meðal keppenda.
Hulda Clara og Ragnhildur léku báðar fyrsta hringinn á 74 höggum, eða einu höggi yfir pari. Andrea lék fyrsta hringinn á 77 höggum, en allar eru þær réttu megin við niðurskurðarlínuna eins og staðan er núna.
Hér má fylgjast með stöðu mótsins.
HotelPlanner Tour
Haraldur Franklín Magnús er á meðal keppenda á Le Vaudreuil Golf Challenge mótinu á HotelPlanner Tour mótaröðinni sem fer fram dagana 2. til 5. júlí í Frakklandi. Mótið er leikið á Golf PGA France du Vaudreuil vellinum í Le Vaudreuil.
Haraldur hóf leik í dag og lék fyrsta hringinn á 74 höggum, eða tveimur höggum yfir pari. Hann fékk þrjá fugla á hringnum en tapaði fimm höggum.
