Fyrsti keppnisdagur Hvaleyrarbikarsins 2026 fór fram á Hvaleyrarvelli í dag. Mikil spenna er í báðum flokkum eftir fyrsta hring mótsins, en fjórir kylfingar deila efsta sætinu í karlaflokki og Guðrún Brá Björgvinsdóttir leiðir í kvennaflokki.
Hvaleyrarbikarinn er fimmta mót tímabilsins á GSÍ mótaröðinni og fer fram dagana 17.-19. júlí.
Hér má fylgjast með stöðu mótsins
Fjórir jafnir í karlaflokki
Róbert Leó Arnórsson, Aron Snær Júlíusson, Daníel Ísak Steinarsson og Sigurður Bjarki Blumenstein léku allir fyrsta hringinn á tveimur höggum undir pari og eru jafnir í efsta sæti.
Stutt er í næstu menn en Böðvar Bragi Pálsson, Guðmundur Snær Elíasson og Jóhannes Guðmundsson eru jafnir í fimmta sæti á einu höggi undir pari. Jóhannes hefur titil að verja á Hvaleyrarvelli eftir frábært mót árið 2025.
Aðeins eitt högg skilur því að sjö efstu kylfinga fyrir annan hringinn og ljóst að baráttan um Hvaleyrarbikarinn er galopin.
Guðrún Brá efst á heimavelli
Í kvennaflokki er Guðrún Brá Björgvinsdóttir, Golfklúbbnum Keili, í forystu eftir hring upp á eitt högg yfir pari. Guðrún Brá fékk tvo fugla og þrjá skolla á hringnum.
Þóra Sigríður Sveinsdóttir er önnur á tveimur höggum yfir pari og Perla Sól Sigurbrandsdóttir er í þriðja sæti á þremur yfir pari. Elsa Maren Steinarsdóttir er fjórða á fjórum yfir pari og Heiða Rakel Rafnsdóttir fimmta á fimm yfir pari.
Eftir annan hring mótsins verður niðurskurður, þar sem efstu 70% kylfinga halda áfram á lokahringinn.
