Íslensku kylfingarnir á LET Access mótaröðinni áttu frábæran dag í dag, þegar fyrsti hringur Allegria Ladies Open mótsins fór fram í Austurríki. Hulda Clara Gestsdóttir, Ragnhildur Kristinsdóttir og Andrea Bergsdóttir eru jafnar í þriðja sæti eftir hringinn, en þær komu allar í hús á 68 höggum, tveimur undir pari vallarins.
Hér má fylgjast með stöðu mótsins
Mótið fer fram dagana 20.-22. maí á Sudburgenland vellinum í Allegria Golf Resort í Austurríki. Völlurinn er krefjandi, en einungis sextán kylfingar léku undir pari í dag.
Hulda Clara hóf hring sinn af miklum krafti og fékk fugl á fyrstu tvær holurnar. Hún fékk alls fjóra fugla og tvo skolla á hringnum.
Ragnhildur átti einnig frábæran dag. Hún fékk sex fugla á hringnum, tvo skolla og einn tvöfaldan skolla. Enginn kylfingur mótsins fékk fleiri fugla en Ragnhildur í dag.
Andrea Bergsdóttir fékk, líkt og Hulda, fjóra fugla og tvo skolla. Hringir þeirra voru einstaklega líkir, en þær fengu sama skorið á tólf holum.
Á undan íslensku kylfingunum eru heimakonan Johanna Ebner á þremur undir pari, og hin danska Cecilie Eggersen. Hún lék hring dagsins á fimm höggum undir pari og leiðir með tveimur höggum.
Það verður spennandi að fylgjast með okkar kylfingum í toppbaráttu næstu dagana! Óskum þeim góðs gengis.
