Gunnlaugur Árni Sveinsson, ásamt alþjóðlegu úrvalsliði háskólagolfara, hefur sigrað lið Bandaríkjanna á Arnold Palmer Cup, sterkasta áhugamannamóti heims.
Mótið fór fram á Tralee Golf Links golfvellinum á Írlandi dagana 3.-5. júní og var leikið með sama sniði og í Ryder og Solheim bikurunum. Lið Bandaríkjanna spilar við lið alþjóðlegra kylfinga en allir kylfingarnir koma úr bandaríska háskólagolfinu. Liðin samanstanda af 12 körlum og 12 konum.
Gunnlaugur var á síðasta ári fyrsti íslenski kylfingurinn til að fá boð í mótið og endurtók hann leikinn því í ár. Hann skilaði alþjóðlega liðinu tveimur vinningum líkt og í fyrra og jafnaði stærsta sigur mótsins í lokaumferðinni í dag.
Alþjóðlega liðið sigraði lið Bandaríkjanna með minnsta mun, 30.5-29.5 og vinna Arnold Palmer Cup því annað árið í röð. Þetta er einungis í fjórða skiptið á öldinni sem það gerist, en lið Bandaríkjanna hafði einnig unnið í tvö af þeim þremur skiptum sem mótið hafði farið fram á Írlandi.
Fyrsti keppnisdagur
Gunnlaugur lék betri bolta í fyrstu umferð með hinni kólumbísku Maria Jose Marin, sem er fimmta á heimslista áhugakvenna.
Þar mættu þau Max Herendeen og Chloe Kovelesky úr liði Bandaríkjanna, en þau eru bæði í 27. á heimslistum áhugakylfinga. Þau léku gott golf í þessum fyrsta leik mótsins og sigruðu Gunnlaug og Maria 3/2. Staðan var jöfn á milli liðanna eftir fyrstu umferð og því allt opið fyrir leiki helgarinnar.
Annar keppnisdagur
Tvær umferðir voru leiknar á öðrum keppnisdegi. Í báðum umferðum var leikinn fjórmenningur.
Daniel Bennett er þrettándi á heimslistanum, Kihei er tólfta og Wheaton er í 58. sæti. Sterkt holl þar á ferð en Gunnlaugur og Daniel léku einn besta hring dagsins og unnu leikinn á átjándu holu, 1/0.
Í hinni umferð dagsins var Gunnlaugur paraður með hinni nýsjálensku Caitlin Maurice. Þau mættu bandaríska parinu Mackenzie Lee og Connor Williams og töpuðu leiknum 6/4.
Lokaumferðin
Gunnlaugi gafst tækifæri til að hefna fyrir tapið í gær gegn Connor Williams í lokaumferðinni. Fyrir hana leiddi alþjóðlega liðið með einu stigi, en 24 stig voru í pottinum í lokaumferðinni. Þar léku allir kylfingar beggja liða tvímenning.
Gunnlaugur átti frábæran hring í þessum lokaleik og jafnaði stærsta sigur mótsins með 6/5 sigri á Williams. Okkar maður raðaði inn fuglum og vann alls átta af holunum þrettán.
Glæsilegur árangur hjá Gunnlaugi og alþjóðlega liðinu sem heldur titlinum og stefnir að því að verja hann á ný á Cherry Hills vellinum árið 2027.
